O‘zbekiston Respublikasi davlat mustaqilligining 35 yilligi — xalqimiz hayotidagi ulug‘ va tarixiy sana. Mustaqillik yurtimizga nafaqat siyosiy va iqtisodiy taraqqiyot yo‘lini ochdi, balki milliy o‘zligimizni anglash, tarixiy xotiramizni tiklash, ona tilimiz, madaniyatimiz, urf-odat va an’analarimizni asrab-avaylash hamda rivojlantirish uchun mustahkam zamin yaratdi.
Har bir xalqning kuchi, avvalo, uning tarixiy xotirasi, ma’naviy merosi va milliy qadriyatlariga bo‘lgan hurmatida namoyon bo‘ladi. Xalqimiz asrlar davomida shakllantirgan kattaga hurmat, kichikka izzat, mehr-oqibat, bag‘rikenglik, mehmondo‘stlik, oila va mahalla qadri kabi ezgu fazilatlar bugun ham jamiyatimiz ma’naviy hayotining muhim tayanchi bo‘lib xizmat qilmoqda.
Mustaqillik yillarida milliy bayramlarimiz, urf-odatlarimiz va xalqimizning boy madaniy merosiga bo‘lgan e’tibor yanada kuchaydi. Ajdodlarimizdan meros bo‘lib kelayotgan an’analarni asrab-avaylash, ularni yosh avlodga yetkazish hamda zamon bilan hamohang ravishda rivojlantirish bugungi avlod zimmasidagi muhim vazifalardan biridir.
Zero, milliy qadriyatlar — bu faqat o‘tmishdan qolgan meros emas. Ular xalqning bugungi hayot tarzini, dunyoqarashini va kelajakka bo‘lgan intilishini belgilaydigan ma’naviy kuchdir. O‘z tarixini bilgan, milliy an’analarini qadrlagan va o‘zligiga sodiq avlodgina Vatan taraqqiyotiga munosib hissa qo‘sha oladi.
Mustaqillik kuni esa ana shu tarixiy xotira, milliy g‘urur va xalq birdamligini o‘zida mujassam etgan eng aziz umumxalq bayramlaridan biridir. Ushbu qutlug‘ sana bizni erishilgan yutuqlarni qadrlash, yurt ravnaqi va xalq farovonligi yo‘lida mas’uliyat bilan mehnat qilishga undaydi.
Bugun oldimizda turgan eng muhim vazifalardan biri — milliy o‘zligimizni, qadriyat va an’analarimizni kelajak avlodlarga munosib tarzda yetkazishdir. Chunki milliy qadriyatlariga tayanib taraqqiy etgan jamiyatning ma’naviy poydevori hamisha mustahkam bo‘ladi.
Mustaqillik — milliy o‘zligimiz, tarixiy xotiramiz, qadriyatlarimiz va kelajakka bo‘lgan ishonchimizning mustahkam tayanchidir.
Kontexnazorato‘quv davlat muassasasi
